Wika at Kapangyarihan sa pelikulang Heneral Luna

Maraming magandang katangian ang pelikulang “Heneral Luna” Masasabi naming ang pinakaagaw-pansing katangian nito ay ang maganda nitong iskrip. Makikita rito ang napakagandang paggamit ng wika at ang kapangyarihang taglay ng bawat linya.

Binuksan ng pelikulang ito ang ating mga mata kung gaano kaganda ang sarili nating wika, ang Tagalog na ngayon ay tinatawag nang Filipino. Hindi lamang ipinakita ng pelikula na ang wika ay nakakapagpahayag ng damdamin kung hindi ipinakita rin dito, na maaari itong ipahayag sa matalinghagang paraan habang ito’y maiintindihan pa rin. 

Sa tagpong magkasama sina Heneral Luna at Isabel, may pagkakataon na sinabi ni Isabel na: “Digmaan ang iyong asawa, ako lamang ay iyong querida” at ang sagot naman ng heneral ay: “Hindi ko asawa ang digmaan, crush lang”. Hindi ba’t napakaganda sa pandinig ng palitang ito at nakakaaliw din pakinggan?

Mapapansin na ang bawat linya ni Heneral Luna sa kabuuan ng pelikula ay nagtataglay ng hindi maubusang awtoridad sa lahat. Hindi man siya ang may pinakamataas na posisyon, mapapansin na halos lahat ng tao ay nirerespeto siya at sinusunod. Halimbawa na lamang ay ang tagpong nangangailangan siya ng napakaraming tao upang maghukay ng trench. Paano siya nakatipon ng mga taong kailangan niya? Hindi ba’t pumunta siya sa bawat kampo at nagbigay ng kautusan, kaya nga siya’y tinaguriang ‘Heneral Artikulo Uno’. 

Maaaring kadalasan sa mga salitang lumalabas sa bibig ni Heneral Luna ay pagbabanta ngunit ang bawat salitang binibitawan niya ay sumisimbolo sa kanyang awtoridad. Marahas man ang kanyang pananalita ay mababatid dito at madadama nating lahat ang kanyang nais ipaalam.

           Naipakita ng pelikulang Heneral Luna ang kapangyarihan ng wika dahil nakakatulong ito sa mga tao upang magkaintindihan at magkaunawaan sila. Tulad na lamang ng tagpo sa Tranvia kung saan naipakita ang pag-alinlangan ng kasamahan ni Heneral Luna, sapagkat wala silang kaalaman sa wikang Amerikano. Ngunit, si Heneral Luna ay hindi nagpadaig at tumugon siya sa sinasabi ng Amerikano gamit ang wikang Pranses pero pareho silang di magkaintindihan at nahirapan silang unawain ang isa’t isa. Kaya’t  sa huli ay nabatid niyang bakit siya magpapakahirap magsalita sa wikang Amerikano kung mayroong siyang sariling wika sa sariling bansa. Nagsasalita siya ng wikang banyaga, samantalang naroon siya sa kanyang sariling bansa.

            At ang huli, masasabi ng aming grupo na talagang epektibo at makapangyarihan ang bawat wika na ginamit sa pelikula dahil nakakapagdulot ito ng epekto sa amin at sa bawat manonood sa paraang naipapahayag ang emosyon ng bawat karakter, o taong gumaganap sa pelikula sa pamamagitan ng kanilang wika. Bagama’t mayroong banyagang wika, nabigyang-buhay nila ang paggamit ng ating sariling wika sa sarili nating bansa.

Mula kina:

Baluyot, Angelika Jane

Baroña, Starlene

Cosculla, Dianne
Chua, Terrence
Dalusung, Pearl
Dean, Danica
Mabulac, Novavilla 
Remo, Hannah
Talabong, Rose ann

BSE-TCSL, PCC, Unang Semestre, Akademikong Taon 2015-2016